Agustín Fernández Paz recomienda Palabras de auga de Marcos Calveiro Emociona a historia de Amadou, o neno protagonista desta novela que nos traslada ao interior de África, a un deses lugares onde a eterna sequía e a guerra máis cruel condicionan a vida de todos. Lemos as experiencias durísimas, e tamén as conmovedoras, deste rapaz de doce anos e sentimos que o noso corazón camiña canda el a través do texto admirable co que nos agasalla Marcos Calveiro O xamán Mkebe ordenou a todos os membros do clan dos Wakati da tribo dos Kimba que abandonasen o país Lomba coa esperanza de atopar unha terra mellor con auga abondosa. Dende entón, homes e mulleres camiñan, baixo un sol abrasador, a sabana poeirenta sen saber que lles pode deparar o futuro. Amadou aprenderá da súa nai a colleitar o alimento agochado nos formigueiros, mais tamén, como afouto guerreiro, haberá de se enfrontar axiña cos perigos da caza e da procura de Numba, o seu irmán maior, desaparecido no campamento dos nenos soldado. Palabras de auga é unha viaxe cara ao interior do continente africano e da súa cultura, mais tamén un camiño iniciático cara á madurez. Un relato emocionante, cativador e conmovedor.